Ныбджэгъу лъапIэхэр, Адыгэ Республикэр зызэхащагъэр илъэс 36-рэ зэрэхъурэм фэшI сышъуфэгушIо!
Непэ тыгу къэтэгъэкIыжьых тиреспубликэ иуцунрэ ихэхъоныгъэрэ ячэзыу шIагъохэр. ЛIэуж зэфэшъхьафхэм къахиубытэрэ цIыфхэу зиIофшIэнкIэ, зисэнаущыгъэкIэ , ячIыгу гупсэ шIулъэгъуныгъэу фыряIэмкIэ Адыгеим иэкономикэ, икультурэ хэхъоныгъэ ашIыным, республикэм ищытхъу чыжьэу Iуным зиIахьышIу хэзышIыхьагъэхэр. Ахэм япсэемыблэжьныгъэ зэдытые унэм лъэпсэ пытэ фишIыгъ.
Тиреспубликэ непэ изытет уасэ фэпшIын хъумэ, Урысыем ишъолъырхэу джырэ уахътэм диштэу хэхъоныгъэ зышIыхэрэм зыкIэ зэращыщыр къыхэгъэщыгъэн фае. ЦIыф лъэпкъ зэфэшъхьафэу Адыгеим щыпсэухэрэм зэгурыIоныгъэ азыфагу зэрилъым, ахэм Iофэу агъэцакIэрэм яшIуагъэкIэ къыдэгъэкIыжьынымрэ мэкъу-мэщымрэ алъэныкъокIэ гъэхъагъэхэр тэшIых, инфраструктурэмкIэ проектышхохэр пхырытэщых, цIыф псэупIэхэр нахь зэтегъэпсыхьагъэ мэхъух, ныбжьыкIэхэми яамалхэм нахь заушъомбгъу.
Тызэгъусэу тфэлъэкIыщтыр тэшIэ тапэкIэ республикэр нахьышIу, нахь дахэ хъуным пае, мэхьанэшхо зиIэ программэхэр пхырытэщых, ахэр зэкIэ зыфытегъэпсыхьагъэхэр цIыфхэм ящыIакIэ джыри нахьышIу шIыгъэныр ары. Тицыхьэ зытелъыжьэу къытпыщылъ Iофтхьабзэхэр итхъухьэхэ зыхъукIэ, тиреспубликэ зыпкъитыныгъэ хэлъэу исоциальнэ-экономикэ хэхъоныгъэ лъыкIотэнымкIэ, унагъохэм гупсэф-тынчыгъэ арылъынымкIэ, къыткIэхъухьэхэрэм пIуныгъэ дэгъу ядгъэгъотынымкIэ, лъэпкъыбэмэ зэдырякультурэр къэтыухъумэнымкIэ пшъэрылъыбэ зэшIотхын тлъэкIыщт.
Тэ тарэгушхо тичIыпIэгъу лIыбланэхэу хэушъхьафыкIыгъэ дзэ операцием хэлажьэхэрэм, Iашэр зыIыгъэу Урысыем ифедэхэр къэзыухъумэхэрэм! Республикэм щыпсэухэрэм лъытэныгъэшхо ахэм афашIы, ялIыхъужъныгъэ, гущыIэу атыгъэм зэрафэшъыпкъэхэм апае.
СилъапIэхэу Адыгеим щыпсэухэрэр! Тэ гъэхъагъэу тшIырэм нэбгырэ пэпчъ иIахь хэлъ, республикэми, хэгъэгуми яиджырэ тарихъ мафэ къэс шъуиIахь хэшъошIыхьэ. Гъэпсын Iофэу жъугъэцакIэрэм ыкIи тичIыгу гупсэ шIулъэгъоу фышъуиIэм апае инэу сышъуфэраз! Анахьэу етIани сирэзэныгъэ гущыIэхэр зыфэгъэхьыгъэхэр тиветеран лъапIэхэр ары. Тиреспубликэ щыIэкIэшIу илъыным лъэпсэ пытэ ахэм фашIыгъ. Ахэр ары къыдэгъэкIыжьынри, мэкъу-мэщри къэзыIэтыгъэхэр, социальнэ псэуалъэхэр зышIыгъэхэр, тикIэлэцIыкIухэр зыпIугъэхэр, тичIыгу гупсэ къэзыухъумагъэхэр. ЦIыфыгъэ шэпхъэ дахэхэмкIи шъоры тызыкIырыплъырэр. Шъо шъуилIыхъужъныгъэрэ шъуиакъылышIуагъэрэ ябгъэпшэн зи щыIэп. Джырэ лIэужхэм пшъэрылъэу яIэр кIэнышхоу къытфэжъугъэнагъэр къэухъумэгъэным имызакъоу, фэдэ пчъагъэкIэ ар нахьыбэ шIыгъэныр ары.
Тиреспубликэ дахэ щыпсэурэ пстэуми сафэлъаIо псауныгъэ пытэ, щыIэкIэшIу яIэнэу, Адыгеимрэ Урысыемрэ яфедэ зыхэлъ ублэпIэ пстэуми гъэхъэгъакIэхэр ащашIынхэу!
